hrísgrjón með indverskum kryddum og rúsínum

Þessi grjón eru svipuð þeim sem ég póstaði um daginn en í þessa uppskrift eru ekki notaðir negulnaglar og piparkorn. Að vísu er þetta tvennt að finna í garam masala kryddblöndunni en hún inniheldur mörg önnur krydd og er hér í litlu magni. Það má alveg sleppa rúsínunum en mér finnst náttúruleg sæta þeirra vera skemmtilegt mótvægi við bragð indversku kryddanna. Ég segi það enn og aftur að þið getið breytt kryddhlutföllum alveg eins og þið viljið og skipt út kryddum ef bragðið er ykkur ekki að skapi, og ef þið viljið meira saltbragð af grjónunum þá er fínt nota smá Maldon salt þegar þau eru komin á diskinn.

HRÍSGRJÓN MEÐ INDVERSKUM KRYDDUM OG RÚSÍNUM

HRÁEFNI

• 1½ bolli (300 g) basmati hrísgrjón
• 3 bollar (750 ml) soðið vatn
• 1 lífrænn grænmetisteningur
• 2 teskeiðar gæða jurtaolía (eða ghee)
• ½ teskeið broddkúmenfræ (cumin seeds)
• ¼ teskeið sinnepsfræ
• ögn af chilli flögum
• ½ teskeið mulið túrmerik
• ¼ teskeið garam masala
• ¼ teskeið mulinn kóríander
• handfylli af rúsínum

AÐFERÐ

1. Skolið grjónin í sigti og geymið þau í sigtinu þar til þið þurfið að nota þau
2. Hellið soðna vatninu (ég sýð það í hraðsuðukatli til að flýta fyrir) í stóra könnu og látið grænmetisteninginn leysast upp í því
3. Hitið olíuna í potti á meðalhita (potturinn þarf að vera nógu stór til að sjóða grjónin) og bætið svo broddkúmen- og sinnepsfræjum út í ásamt chilli flögum. Leyfið þessu að liggja í olíunni þar til fræin fara að poppa. Þar sem lítil olía er notuð þá er óþarfi að hræra í fræjunum í pottinum, sjáið bara til þess að þau liggi í olíunni
4. Um leið og fræin byrja að poppa þá bætið þið soðinu út í ásamt grjónum, túrmerik, garam masala og kóríander og hrærið rólega saman
5. Notið hæsta hita þar til vatnið fer að sjóða (tekur stutta stund) og stillið þá hitann á lægsta og sjóðið grjónin í 12-15 mínútur. Notið lok á pottinn en skiljið eftir smá rifu til þess að hleypa gufunni út
6. Þegar um þrjár mínútur eða svo eru eftir af suðutíma grjónanna dreifið þá handfylli af rúsínum yfir þau en ekki hræra neitt, þið hrærið bara rúsínunum saman við áður en þið berið grjónin fram

hrísgrjón með indverskum kryddum

Um daginn var bóndinn að grilla kjúkling og spurði hvort ég væri til í að útbúa góð grjón til að bera fram með honum. Með því átti hann við grjón með einhvers konar kryddblöndu. Ég hef leikið mér að því í gegnum tíðina að bragðbæta grjón með alls kyns kryddum og jurtum og í þetta sinn ákvað ég að skrifa niður það sem ég notaði til þess að deila hér á blogginu. Ég sjálf er hrifin af einföldum grillmat, ég er lítið fyrir rjómasósur eða of margar tegundir af meðlæti með grilluðu kjöti. Einföld salöt eða grjón finnst mér alltaf eiga vel við. Stundum er nú bara ágætt að setja tamarisósu út á grjón en ég neita því ekki að það er gaman að bæta við indverskum kryddum til að skapa skemmtilegri stemningu. Ég hef sagt það áður að þessar uppskriftir mínar eru ekkert heilagar, þið getið breytt kryddhlutföllum alveg eins og þið viljið og skipt út kryddum ef bragðið er ykkur ekki að skapi. Ég mæli með því að fjarlægja negulnaglana og piparkornin áður en þið berið þessi grjón fram og ef þið viljið meira saltbragð af grjónunum þá er fínt nota smá Maldon salt þegar grjónin eru komin á diskinn.

HRÍSGRJÓN MEÐ INDVERSKUM KRYDDUM

HRÁEFNI

• 1½ bolli (300 g) basmati hrísgrjón
• 3 bollar (750 ml) soðið vatn
• 1 lífrænn grænmetisteningur
• 2 teskeiðar gæða jurtaolía (eða ghee)
• ¼ teskeið sinnepsfræ
• ¼ teskeið kóríanderfræ
• 1 teskeið broddkúmenfræ (cumin seeds)
• 4 svört piparkorn
• 3 negulnaglar
• ögn af chilli flögum
• ½ teskeið mulið túrmerik

AÐFERÐ

1. Skolið grjónin í sigti og geymið þau í sigtinu þar til þið þurfið að nota þau
2. Hellið soðna vatninu (ég sýð það í hraðsuðukatli til að flýta fyrir) í stóra könnu og látið grænmetisteninginn leysast upp í því
3. Hitið olíuna í potti á meðalhita (potturinn þarf að vera nógu stór til að sjóða grjónin) og bætið svo öllum kryddunum út í nema túrmerikinu. Leyfið kryddunum að liggja í olíunni þar til fræin fara að poppa. Þar sem einungis eru tvær teskeiðar af olíu í uppskriftinni þá þarf ekkert að vera að velta kryddunum til og frá í pottinum, sjáið bara til þess að þau liggi í olíunni
4. Um leið og fræin byrja að poppa þá bætið þið soðinu út í ásamt grjónunum og túrmerikinu og hrærið rólega saman
5. Notið hæsta hita þar til vatnið fer að sjóða og stillið þá hitann á lægsta og sjóðið grjónin í 12-15 mínútur. Notið lok á pottinn en skiljið eftir smá rifu til þess að hleypa gufunni út
6. Áður en þið berið grjónin fram þá mæli ég með því að fjarlægja negulnaglana og piparkornin, einkum ef börn sitja til borðs

tómatsúpa með hvítlauk og timían

Á þessum bæ kallast þessi tómatsúpa ekkert annað en Mooney súpa því ég smakkaði hana fyrst hjá vinkonu minni, sem ég kalla Mooney. Ef mig minnir rétt þá birtist uppskriftin í aukablaði með Morgunblaðinu fyrir mörgum árum síðan en ég veit ekki hver er höfundurinn. Það sem heillaði mig við súpuna var hversu einfalt var að útbúa hana og því finnst mér hún kjörin á köldum dögum þegar ég hef lítinn tíma til að stússast í eldhúsinu. Ég er búin að breyta upprunalegu uppskriftinni lítilsháttar án þess þó að breyta hlutföllunum. Ég bætti við rauðum linsubaunum, kóríander, papriku og þykkri kókosmjólk (enska: creamed coconut). Ég nota ekki alltaf þykku kókosmjólkina en mér finnst ágætt að nota linsubaunirnar því þær eru ríkar af járni (tvær matskeiðar eru svo sem engin ósköp en betra en ekki neitt).

TÓMATSÚPA MEÐ HVÍTLAUK OG TIMÍAN

HRÁEFNI

• 1-2 matskeiðar extra virgin ólífuolía
• 1 laukur, fínsaxaður
• 2 hvítlauksrif, fínsöxuð
• 2 grænmetisteningar, helst lífrænir og gerlausir
• 2 dósir tómatar (2 x 400 g)
• 1.2 lítrar vatn
• má sleppa: 2 matskeiðar rauðar linsubaunir
• 2 teskeiðar timían
• ¼-½ teskeið mulinn kóríander
• ¼ teskeið paprika
• 1 teskeið sjávarsalt
• nýmalaður svartur pipar eftir smekk
• má sleppa: 1-1½ matskeið lífræn þykk kókosmjólk (creamed coconut)

AÐFERÐ

1. Samkvæmt upprunalegu uppskriftinni var öllum hráefnum skellt í pott í einu en mér finnst betra að byrja á því að bara rétt aðeins steikja laukinn og hvítlaukinn í olíunni. Það þarf ekki að brúna laukinn heldur bara mýkja hann (notið 2 matskeiðar af olíu ef þið sleppið kókosmjólkinni)
2. Bætið restinni af hráefninu út í nema þykku kókosmjólkinni og látið súpuna malla í 30 mínútur
3. Ef þið notið þykku kókosmjólkina hrærið henni þá saman við undir lokin og fjarlægið svo pottinn af hellunni
4. Ef ykkur finnst það betra þá má mauka súpuna með töfrasprota til að ná fram silkimjúkri áferð (það má líka mauka hana í matvinnsluvél en þá er ráðlagt að leyfa henni að kólna áður og hita svo aftur upp áður en súpan er borin fram)
5. Berið súpuna fram með heimabökuðu brauði eða hvítlauksbrauði

indverskt te (chai latte)

Fyrir mörgum árum síðan vorum við í kynnum við indverskan mann sem á einhverjum tímapunkti gaf okkur pakka af kryddblöndu fyrir indverskt te. Við mældum aldrei hversu mikið af hráefninu við notuðum til að útbúa teið heldur bara settum eitthvað í pottinn ásamt kryddblöndunni og alltaf bragðaðist þetta vel. Síðar meir þegar við vorum búin með kryddblönduna þá byrjuðum við að fikra okkur áfram með hin ýmsu krydd til að fá sama bragðið. Uppskriftin, ef uppskrift má kalla, er hér að neðan en hlutföllin eru ekki heilög heldur einungis leiðbeinandi. Ef ykkur líkar ekki eitthvað krydd þá getið þið sleppt því eða notað minna. Þið megið líka nota meira af því sem ykkur þykir gott. Það er engin regla þegar kemur að því að búa til indverskt te heldur er best að leyfa bara innsæinu að ráða. Passið ykkur samt á sykrinum, ekki fara að bæta of miklum sykri út í því það er óþarfi að láta sætubragð yfirtaka gott kryddbragð. Stundum nota ég 1½-2 matskeiðar af hrásykri og bæti svo hálfri matskeið af heimagerðum vanillusykri út í. Ef þið hafið tíma þá getið þið byrjað á því að sjóða vatnið með kryddunum eingöngu til að fá sterkara te og þið bætið svo restinni af hráefninu út í eilítið síðar. Þið getið líka flóað mjólkina sér og gert froðu til þess að láta þetta líta út eins og alvöru latte.

INDVERSKT TE (CHAI LATTE)

HRÁEFNI

• 500 ml vatn
• 500 ml mjólk/sojamjólk
• 4 pokar lífrænt svart te
• 2-2½ matskeið lífrænn hrásykur
• 2-3 kanilstangir (það má líka nota kanilkrydd)
• ½ teskeið negulnaglar
• ¼ teskeið anísfræ
• nokkur svört piparkorn eða nýmalaður svartur pipar
• örlítið engifer
• örlítið múskat
• örlítil kardamoma (má líka nota heilar kardamomur)

AÐFERÐ

1. Setjið öll hráefnin í pott og sjóðið á meðal-hæsta hita. Um leið og suðan kemur upp fjarlægið pottinn af hellunni
2. Berið teið fram í bollum eða skálum og njótið!