gulrótarmöffins

Ég trúi varla að ég hafi síðast birt uppskrift hérna á matarblogginu í desember … á síðasta ári! Þarf ég ekki að koma með einhverjar afsakanir? Ein ástæðan er að ég flutti frá Luxembourg til Englands í nóvember og ofninn í nýja eldhúsinu, sem var nýr, var ólíkur öðrum ofnum sem ég hef notað. Ég þurfti að breyta ofnstillingunum og baksturstímanum á öllum uppskriftunum mínum og var frekar rög við að halda áfram með bloggið þar til ég hafði prófað uppskriftirnar í öðrum ofni. Fyrr í sumar flutti ég svo innan Englands og er núna með tvo nýja ofna sem virka eins og aðrir sem ég hef notað og ég þarf ekki að breyta neinu. Á meðan ég tók upp úr kössunum og kom okkur fyrir gerði ég nokkrar tilraunir sem ég á eftir að fínpússa eilítið áður en ég birti uppskriftirnar hér. Þessi uppskrift að gulrótarmöffinsum er ekki ný (hún er þegar á ensku útgáfunni) en þegar líður að hausti þá byrja ég að hugsa um gulrætur og bláber og kartöflur. Ekki endilega í þessari röð. Í dag eru það gulrætur. [Uppfærsla 1. okt. '14: Undanfarið hef ég bakað þessi möffins nokkuð oft því börnin eru með æði fyrir gulrótum þessa dagana, vilja taka með sér skornar gulrætur í skólann og helst eitt möffins líka til að narta í. Ég jók aðeins speltið og breytti hlutföllum gulrótanna og kryddanna eilítið, og bætti við kardamomum og negul, sem krakkarnir eru mjög ánægðir með.]

GULRÓTARMÖFFINS

HRÁEFNI

• 250 g spelti (ég blanda grófu og fínu saman)
• 2½-3 teskeiðar vínsteinslyftiduft
• ½ teskeið fínt sjávarsalt
• 1-1½ teskeið kanill
• ½-1 teskeið engifer
• ½ teskeið múskat
• má sleppa: ⅛-¼ teskeið kardimomma
• má sleppa: ⅛-¼ teskeið negull
• 1 stórt (hamingju)egg
• 100 g lífrænn hrásykur
• 2 matskeiðar hreint hlynsíróp eða agave
• 1 matskeið kókosolía eða önnur góð jurtaolía
• 75-90 ml (5-6 matskeiðar) lífræn vanillujógúrt (eða hrein jógúrt + ¼-½ teskeið lífrænn vanillusykur)
• 175 g gulrætur, rifnar gróft

Útfærsla: Stundum nota ég valhnetur í uppskriftina og hakka þá 50 grömm (ca. ½ bolli) sem ég bæti út í deigið ásamt gulrótunum. Ef ég nota hneturnar þá nota ég bara ½ matskeið af kókosolíu. Það er næg fita í hnetunum og mér finnst möffinsin með hnetunum verða aðeins of klístruð ef ég nota 1 matskeið.

AÐFERÐ

1. Blandið þurrefnunum saman í stórri skál. Setjið til hliðar
2. Notið aðra skál til að blanda saman eggi, sykri, sírópi og kókosolíu (ef olían er í föstu formi látið þá krukkuna standa í skál með heitu vatni fyrir notkun). Blandið svo jógúrtinni saman við
3. Rífið gulræturnar á grófu rifjárni
4. Bætið eggjablöndunni ásamt rifnu gulrótunum (og hökkuðum valhnetum ef notaðar) út í skálina með þurrefnunum og hrærið bara létt, alls ekki mikið. Deigið á að vera nokkuð létt í sér þannig að þið þurfið bara að velta því með sleif þar til hráefnin hafa blandast saman
5. Smyrjið silíkonmöffinsform með kókosolíu áður en deigið fer í formin (gerir 12-14 stykki). Þið getið ekki notað pappírsform fyrir þessa uppskrift þar sem hún inniheldur litla fitu
6. Bakið við 180-190°C í 20-25 mínútur (175°C ef bakað með blæstri)
7. Látið möffinsin kólna í formunum og svo á kæligrind í 5-10 mínútur

skonsur

Uppskriftin að skonsunum varð til vegna einskærrar leti af minni hálfu. Ég hef lengi verið að leika mér með uppskrift að amerískum pönnukökum og er alltaf að gera örlitar breytingar á henni. Það var einn sunnudagsmorgun sem ég ætlaði að negla niður lokaútgáfu þegar mér fannst ameríski pönnukökuandinn bara ekki vera yfir mér og auk þess nennti ég ekki að þeyta eggjahvítur. Ég horfði á krotið í glósubókinni og hugsaði með mér að ég gæti gert úr þessu skonsur með smá breytingum. Síðan þá hafa þessar oft verið í morgunmatinn á sunnudögum - ég er einmitt að gera þær núna - enda tekur litla stund að skella í þær. Það er ekki mikil olía í þeim þannig að þið aukið hana bara ef ykkur finnst þær of þurrar. Við hjónin borðum þær yfirleitt með osti og sultu en krakkarnir taka oftast fram agave- eða hlynsírópið. Mér finnst líka gott að borða þær með t.d. eggjasalati ef ég á það til.

SKONSUR

HRÁEFNI

• 325 g spelti (2½ bollar)
• 2 matskeiðar hrásykur, lífrænn
• 1 matskeið agave
• 2-2½ teskeið vínsteinslyftiduft
• ½ teskeið sjávarsalt, fínt
• 2 stór egg
• 400 ml mjólk/sojamjólk
• 2½ matskeið kókosolía eða önnur góð jurtaolía

AÐFERÐ

1. Blandið þurrefnum saman í stórri bökunarskál
2. Myndið holu í speltið, setið eggin í holuna og rétt hrærið með pískara til að brjóta rauðurnar. Hellið svo mjólkinni rólega út í og hrærið allan tímann með pískara þar til deigið er kekklaust
3. Bætið agave og kókosolíu út í og hrærið vel saman við (ef olían er í föstu formi látið þá krukkuna standa í heitu vatni í smá stund)
4. Berið þunnt lag af kókosolíu á pönnu og látið pönnuna hitna á miðlungshita (ég byrja á stillingu 6 af 9 og lækka fljótlega niður í 5 eða 4 þegar skonsurnar verða full dökkar. Ef pannan verður of heit þá er gott að fjarlægja hana af hellunni í eitt augnablik. Ef þið notið gas þá myndi ég hafa hitann frekar lágan)
5. Notið ausu til að hella deigi á pönnuna og þegar loftbólur hafa myndast á yfirborðinu þá snúið þið skonsunni við með mjúkum spaða. Þetta getur tekið um 2 mínútur en það tekur minni tíma að baka hina hliðina. Færið skonsuna svo yfir á disk og staflið næstu skonsum ofan á (ég næ ca. 12 skonsum úr deiginu)
6. Berið fram með osti og sultu, hreinu hlynsírópi eða agave, eða hverju sem ykkur þykir gott og er í hollari kantinum

marengstoppar (súkkulaði)

© Lísa Hjalt | Lestur & Latte

Uppskriftina að marengstoppum (með súkkulaði og súkkulaðisósu) er nú að finna á Lestur & Latte blogginu (smellið á tengilinn).

súkkulaðikrem eða -sósa

Yngri dóttir okkar átti afmæli í gær og þar sem hún elskar marengs þá skellti ég í marengstoppa sem ég ber fram með þeyttum rjóma, ferskum berjum og heimagerðri súkkulaðisósu. Ég deildi einmitt mynd á Facebook síðunni í gær þegar ég var að baka og lofaði uppskrift, sem ég birti fljótlega. En ég áttaði mig á því þegar ég var að útbúa sósuna að ég hafði lofað að deila nýju súkkulaðikremi með ykkur, kremi sem ég er farin að nota á skúffukökuna. Ég nota sömu uppskrift þegar ég geri sósu fyrir marengstoppa en eyk þá rétt aðeins vatnið til að hafa það meira fljótandi. Sykur telst náttúrlega aldrei vera hollusta en mér líður betur að blanda saman lífrænum hrásykri við agave síróp til að gera krem heldur en að nota flórsykur. Ég hef ekki notað flórsykur síðan 2006 og hef aldrei saknað hans. Það er fljótlegt að útbúa kremið en hafið í huga að það þarf að standa í klukkutíma fyrir notkun.

SÚKKULAÐIKREM EÐA -SÓSA

HRÁEFNI

• 3 matskeiðar gott kakó, helst lífrænt/fair-trade
• 1½ matskeið lífrænn hrásykur
• 2½ matskeið agave
• 3-3½ matskeið vatn (4½-5 msk = ca. 75 ml ef súkkulaðisósa)
• lítill bútur (20 g) lífrænt dökkt súkkulaði eða mjólkursúkkulaði
• má sleppa: klípa sjávarsalt, fínt

AÐFERÐ

1. Setjið allt hráefnið í lítinn pott eða pönnu
2. Hitið við meðalhita þar til það fer að sjóða og hrærið rólega á meðan. Þegar suðan er komin upp þá fjarlægið þið pottinn/pönnuna af hellunni
3. Hellið kreminu í skál og leyfið því að standa í klukkutíma fyrir notkun

grænmetisbaka með kartöflum og vorlauk

Kannski væri bara réttast að kalla þessa uppskrift karöflur með smá böku til hliðar! Það er næstum því óeðlilegt hversu hrifið heimilisfólkið mitt er af kartöflum og því nota ég eins mikið af þeim og rúmast í bökudisknum. Ólíkt mörgum frönskum grænmetisbökum (quiche) þá eru ekki 5 egg og rjómi í þessari og heldur ekki heilt fjall af smjöri í botninum. Í raun er ekkert smjör í honum. Það þarf hvorki að setja deigið í plastfilmu og láta það standa né að forbaka botninn. Hljómar það ekki bara nokkuð vel? Ef þið hafið keypt deig í svona bökur hingað til þá er kominn tími til að láta af þeirri iðju og gera þetta sjálf. Það er auðveldara en þið haldið og hollara. Ef þið eruð hrifin af kartöflum þá vona ég að ykkur líki bakan en ég á eftir að deila fleiri uppskriftum af grænmetisbökum hér á síðunni.

GRÆNMETISBAKA MEÐ KARTÖFLUM OG VORLAUK

HRÁEFNI

FYLLING

• 4 stórar karöflur (ca. 600 g), forsoðnar í 20 mínútur
• 2 egg
• 250 g kotasæla
• 2 teskeiðar (lífrænt) sinnep
• 1 teskeið þurrkuð steinselja eða timían
• 1 teskeið hvítlaukssalt
• ¼ teskeið rósmarín, þurrkað
• ¼ teskeið sjávarsalt
• 7 cm bútur af grænum hluta eins vorlauksbúnts, sneiddur
• 2 góðar handfyllir (ca. 60 g) af blönduðum salatblöðum eða spínati
• Ofan á fyllinguna: 75-100 g rifinn ostur og örlítið af nýrifnum parmesan

BOTN

• 1¼ bolli spelti
• ½ teskeið sjávarsalt
• 2½ matskeið lífræn jurtaolía
• 4 matskeiðar vatn

AÐFERÐ

1. Byrjið á að forsjóða kartöflurnar ca. klukkutíma áður en þið byrjið á grænmetisbökunni: Sjóðið þær í 20 mínútur án loks. Hellið vatninu af og leyfið þeim að kólna
2. Í stóra skál skulið þið blanda saman eggjum (það má hræra þau létt), kotasælu, sinnepi, kryddjurtum, salti og salatblöðum
3. Takið vorlauksbúntið og skerið 7 cm bút af græna hlutanum og sneiðið nokkuð fínt. Bætið saman við og setjið skálina til hliðar á meðan þið gerið botninn
4. Fyrir botninn: Sigtið speltið og saltið í aðra stóra skál. Bætið olíu og vatni í skálina og blandið rólega saman með sleif. Notið hendurnar til þess að hnoða deigið örlítið í skálinni til að fá tilfinningu fyrir áferðinni. Ef það vill molna þá þurfið þið aðeins meiri olíu; ef það er of olíukennt þá notið þið meira spelti. (Ef það þarf meiri olíu, setjið þá bara nokkra dropa í lófann og hnoðið deigið aðeins í höndunum þar til áferðin verður rétt)
5. Stráið spelti á borðplötu og mótið kúlu úr deiginu. Fletjið það út með kökukefli þar til þið hafið hring sem er um 28 cm að þvermáli. Notið örlítið af olíu til að smyrja 24 cm bökudisk og setjið deigið í formið. Það er ágætt að stinga á nokkrum stöðum í botninn með gaffli
6. Flysjið kartöflurnar, skerið þær í bita og blandið þeim saman við fyllinguna. Hellið svo fyllingunni ofan í botninn, jafnið út og stráið ostinum yfir
7. Bakið við 180°C (undir- og yfirhiti) í 50-55 mínútur þar til osturinn er orðinn gullinbrúnn
8. Leyfið bökunni að standa í um 5 mínútur áður en þið berið hana fram

sveppasalat

Á laugardaginn kom ég við í tímaritabúð og var að blaða í hinum og þessum tímaritum. Ég fletti í gegnum franska matarblaðið Saveurs og sá mynd af sveppasalati sem var aðeins of girnilegt. Ég vissi að það léti mig ekki friði fyrr en ég smakkaði það þannig að það var ákveðið að bera salatið fram sem meðlæti sama kvöld. Ég skildi ekki alveg öll orðin í aðferðarlýsingunni en ég lagði innihaldið á minnið og þetta er mín útgáfa af salatinu (skammturinn í blaðinu var mun stærri því þeir notuðu 1 kíló af sveppum). Að útbúa salatið gæti ekki verið einfaldara en hafið í huga að það þarf að marínera sveppina í tvær klukkustundir. Ég bar það fram með grilluðum kjúklingaleggjum og kúskús og eins og eiginmaðurinn orðaði það þá var það óvenjulega gott í einfaldleika sínum. Ég er alveg sammála.

SVEPPASALAT

300 g sveppir
1½ matskeið jómfrúarólífuolía
safi úr ca. ⅓ af sítrónu
sjávarsalt
væn lúka af ferskum kóríander


Sneiðið sveppina (eða sparið tíma og kaupið þá sneidda) og setjið þá í stóra skál ásamt ólífuolíu, sítrónusafa og salti. Setjið plastfilmu yfir skálina og marínerið sveppina í tvær klukkustundir. Ef möguleiki, hrærið þá létt í skálinni af og til.

Saxið ferskan kóríander og blandið saman við áður en þið berið salatið fram.

quinoa búðingur með grískri jógúrt og jarðarberjum

© Lísa Hjalt | Lestur & Latte

Uppskriftina að quinoa-búðingnum er nú að finna á Lestur & Latte blogginu (smellið á tengilinn).

hrísgrjón með indverskum kryddum og rúsínum

Þessi grjón eru svipuð þeim sem ég birti um daginn en í þessa uppskrift eru ekki notaðir negulnaglar og piparkorn. Að vísu er þetta tvennt að finna í garam masala kryddblöndunni en hún inniheldur mörg önnur krydd og er hér í litlu magni. Það má alveg sleppa rúsínunum en mér finnst náttúruleg sæta þeirra vera skemmtilegt mótvægi við bragð indversku kryddanna. Ég segi það enn og aftur að þið getið breytt kryddhlutföllum alveg eins og þið viljið og skipt út kryddum ef bragðið er ykkur ekki að skapi, og ef þið viljið meira saltbragð af grjónunum þá er fínt nota smá Maldon salt þegar þau eru komin á diskinn.

HRÍSGRJÓN MEÐ INDVERSKUM KRYDDUM OG RÚSÍNUM

HRÁEFNI

• 1½ bolli (300 g) basmati hrísgrjón
• 3 bollar (750 ml) soðið vatn
• 1 lífrænn grænmetisteningur
• 2 teskeiðar gæða jurtaolía (eða ghee)
• ½ teskeið broddkúmenfræ (cumin seeds)
• ¼ teskeið sinnepsfræ
• ögn af chilli flögum
• ½ teskeið mulið túrmerik
• ¼ teskeið garam masala
• ¼ teskeið mulinn kóríander
• handfylli af rúsínum

AÐFERÐ

1. Skolið grjónin í sigti og geymið þau í sigtinu þar til þið þurfið að nota þau
2. Hellið soðna vatninu (ég sýð það í hraðsuðukatli til að flýta fyrir) í stóra könnu og látið grænmetisteninginn leysast upp í því
3. Hitið olíuna í potti á meðalhita (potturinn þarf að vera nógu stór til að sjóða grjónin) og bætið svo broddkúmen- og sinnepsfræjum út í ásamt chilli flögum. Leyfið þessu að liggja í olíunni þar til fræin fara að poppa. Þar sem lítil olía er notuð þá er óþarfi að hræra í fræjunum í pottinum, sjáið bara til þess að þau liggi í olíunni
4. Um leið og fræin byrja að poppa þá bætið þið soðinu út í ásamt grjónum, túrmerik, garam masala og kóríander og hrærið rólega saman
5. Notið hæsta hita þar til vatnið fer að sjóða (tekur stutta stund) og stillið þá hitann á lægsta og sjóðið grjónin í 12-15 mínútur. Notið lok á pottinn en skiljið eftir smá rifu til þess að hleypa gufunni út
6. Þegar um þrjár mínútur eða svo eru eftir af suðutíma grjónanna dreifið þá handfylli af rúsínum yfir þau en ekki hræra neitt, þið hrærið bara rúsínunum saman við áður en þið berið grjónin fram

hrísgrjón með indverskum kryddum

Um daginn var bóndinn að grilla kjúkling og spurði hvort ég væri til í að útbúa góð grjón til að bera fram með honum. Með því átti hann við grjón með einhvers konar kryddblöndu. Ég hef leikið mér að því í gegnum tíðina að bragðbæta grjón með alls kyns kryddum og jurtum og í þetta sinn ákvað ég að skrifa niður það sem ég notaði til þess að deila hér á blogginu. Ég sjálf er hrifin af einföldum grillmat, ég er lítið fyrir rjómasósur eða of margar tegundir af meðlæti með grilluðu kjöti. Einföld salöt eða grjón finnst mér alltaf eiga vel við. Stundum er nú bara ágætt að setja tamarisósu út á grjón en ég neita því ekki að það er gaman að bæta við indverskum kryddum til að skapa skemmtilegri stemningu. Ég hef sagt það áður að þessar uppskriftir mínar eru ekkert heilagar, þið getið breytt kryddhlutföllum alveg eins og þið viljið og skipt út kryddum ef bragðið er ykkur ekki að skapi. Ég mæli með því að fjarlægja negulnaglana og piparkornin áður en þið berið þessi grjón fram og ef þið viljið meira saltbragð af grjónunum þá er fínt nota smá Maldon salt þegar grjónin eru komin á diskinn.

HRÍSGRJÓN MEÐ INDVERSKUM KRYDDUM

HRÁEFNI

• 1½ bolli (300 g) basmati hrísgrjón
• 3 bollar (750 ml) soðið vatn
• 1 lífrænn grænmetisteningur
• 2 teskeiðar gæða jurtaolía (eða ghee)
• ¼ teskeið sinnepsfræ
• ¼ teskeið kóríanderfræ
• 1 teskeið broddkúmenfræ (cumin seeds)
• 4 svört piparkorn
• 3 negulnaglar
• ögn af chilli flögum
• ½ teskeið mulið túrmerik

AÐFERÐ

1. Skolið grjónin í sigti og geymið þau í sigtinu þar til þið þurfið að nota þau
2. Hellið soðna vatninu (ég sýð það í hraðsuðukatli til að flýta fyrir) í stóra könnu og látið grænmetisteninginn leysast upp í því
3. Hitið olíuna í potti á meðalhita (potturinn þarf að vera nógu stór til að sjóða grjónin) og bætið svo öllum kryddunum út í nema túrmerikinu. Leyfið kryddunum að liggja í olíunni þar til fræin fara að poppa. Þar sem einungis eru tvær teskeiðar af olíu í uppskriftinni þá þarf ekkert að vera að velta kryddunum til og frá í pottinum, sjáið bara til þess að þau liggi í olíunni
4. Um leið og fræin byrja að poppa þá bætið þið soðinu út í ásamt grjónunum og túrmerikinu og hrærið rólega saman
5. Notið hæsta hita þar til vatnið fer að sjóða og stillið þá hitann á lægsta og sjóðið grjónin í 12-15 mínútur. Notið lok á pottinn en skiljið eftir smá rifu til þess að hleypa gufunni út
6. Áður en þið berið grjónin fram þá mæli ég með því að fjarlægja negulnaglana og piparkornin, einkum ef börn sitja til borðs

indverskt te (chai latte)

© Lísa Hjalt | Lestur & Latte

Uppskriftina að indverska teinu er nú að finna á Lestur & Latte blogginu (smellið á tengilinn).

súkkulaðibitakökur með möndlum og haframjöli

Ég var að baka smákökur með krökkunum um daginn og varð að tilraunast aðeins. Þessar kökur heppnuðust einstaklega vel en til öryggis bakaði ég þær aftur í gær bara til að vera alveg viss um að þær væru jafn góðar í seinna skiptið. Við smjöttuðum alveg jafn mikið þannig að krakkarnir gáfu þeim grænt ljós á uppskriftasíðuna. Ég er viss um að þær bragðast vel með 70% súkkulaði en krökkunum mínum finnst það ekki gott þannig að ég nota 50%. Það má líka alveg nota lífrænt mjólkursúkkulaði en athugið að það gefur minna kakóbragð. Það er ekki leiðinlegt að borða þessar með heita súkkulaðinu sem ég póstaði um daginn.

SÚKKULAÐIBITAKÖKUR MEÐ MÖNDLUM OG HAFRAMJÖLI

HRÁEFNI

• 1 stórt (hamingju)egg
• 70 g hrásykur, lífrænn
• 2 matskeiðar agave
• 2 matskeiðar lífrænt hnetusmjör
• 2 matskeiðar kókosolía
• 30 g spelti
• ½ teskeið vínsteinslyftiduft
• ½ teskeið fínt sjávarsalt
• 2 teskeiðar kakó, helst lífrænt/fair-trade
• 50 g gróft haframjöl
• 70 g möndlur, hakkaðar
• 70 g lífrænt 50% eða 70% súkkulaði, saxað

AÐFERÐ

1. Hrærið eggi, sykri, agave, hnetusmjöri og kókosolíu saman í stórri skál (ef olían er í föstu formi þá þarf bara að setja krukkuna í skál með heitu vatni fyrir notkun)
2. Blandið saman spelti, lyftidufti, salti og kakói í lítilli skál, bætið svo út í eggjablönduna og hrærið létt saman
3. Bætið haframjöli út í ásamt hökkuðum möndlum og blandið rólega saman (mér finnst best að nota matvinnsluvél til að hakka möndlurnar)
4. Saxið súkkulaðið, bætið því út í og blandið létt saman við
5. Setjið bökunarpappír á stóra bökunarplötu
6. Takið ca. matskeið af deigi og setjið á bökunarplötuna og sjáið til þess að hafa gott bil á milli svo kökurnar renni ekki saman í ofninum. Ég næ um 24 kökum úr deiginu og baka 12 í einu
7. Bakið við 180°C gráður á undir- og yfirhita í 12 mínútur
8. Kökurnar eru mjúkar þegar þær koma úr ofninum og því er best að leyfa þeim aðeins að standa áður en þið færið þær yfir á kæligrind til að láta kólna frekar eða berið þær fram

heitt súkkulaði með heimagerðum vanillusykri

Þessa dagana ríkir einhvers konar æði fyrir heitu súkkulaði á heimilinu. Nýbakað brauð og heitt súkkulaði er blanda sem við fáum ekki nóg af. Hljómar freistandi, ekki satt? Þetta kallast nú varla uppskrift en þessi tiltekna blanda er uppáhald barnanna. Ég nota bara kakóduft í þessa, ég er ekkert að bræða súkkulaði neitt sérstaklega, og það tekur enga stund að búa þetta til. Ég nota heimagerðan vanillusykur sem gefur sætt bragð þannig að það þarf í raun ekki að bera súkkulaðið fram með rjóma. Við skulum orða það þannig að á sunnudögum notum við rjóma/lífrænan vanilluís. Persónulega vil ég hafa meira súkkulaðibragð og jafnvel smá chilli. Það veltur kannski svolítið á kakóduftinu sem ég nota því það getur jú verið mismunandi. Stundum eyk ég kakóið eða krydda með smá chilli. Svo má setja út í nokkra bita af lífrænu dökku súkkulaði.

HEITT SÚKKULAÐI MEÐ VANILLUSYKRI

HRÁEFNI

• 1 lítri mjólk
• 2 matskeiðar hrásykur, lífrænn
• ½ matskeið heimagerður vanillusykur
• 3 matskeiðar gott kakó, helst lífrænt/fair-trade
• hnífsoddur sjávarsalt (má sleppa)

AÐFERÐ

1. Hitið mjólkina í potti á meðalhita
2. Bætið sykrinum, kakóinu og saltinu út í og hrærið rólega þar til kakóið hefur leyst upp
3. Hrærið af og til rólega þar til suðan kemur upp og fjarlægið þá strax af hellunni
4. Berið fram með eða án rjóma

HEIMAGERÐUR VANILLUSYKUR

Ég birti „uppskriftina“ mína að heimagerðum vanillusykri fyrr á þessu ári en skrifa hana hér líka upp á þægindi. Það er mjög auðvelt að gera sinn eigin vanillusykur, það eina sem þarf er hrásykur og vanillustöng.

Kljúfið vanillustöngina í tvennt: skerið í gegnum hana miðja með beittum hníf, og skafið kjarnann úr henni með hnífsoddinum. Setjið lífrænan hrásykur í glerkrukku (með loki) ásamt kjarnanum og vanillustönginni sjálfri. Það þarf ekki að setja kjarnann í krukkuna heldur er nóg að setja bara vanillustöngina sem búið er að skera í tvennt og skafa úr. En ég nota kjarnann, mér finnst það skemmtilegra og það gefur enn meira vanillubragð.

epla- og kanilmöffins

Það er óhætt að segja að þessir muffinsar eru ansi algengir hér á bæ enda eiga epli og kanill alltaf vel við. Við köllum þá alltaf appins og það hefur örugglega verið eiginmaðurinn sem setti það orð saman úr orðunum 'apps' og muffins á einhverjum tímapunkti. Ef ég hef ekki tíma til að baka eplakökuna þá skelli ég frekar í þessa, enda fljótlegt. Ég nota alltaf eina teskeið af kanil en ef ykkur finnst kanilbragðið verða of yfirgnæfandi þá minnkið þið bara magnið og ef þið notið venjulegt lyftiduft þá er ein teskeið nóg. Ég er svo með nokkrar útfærslur hér að neðan ef þið viljið leika ykkur með uppskriftina.

EPLA- OG KANILMÖFFINS

HRÁEFNI

• 200 g spelti(1½ bolli)
• 2 teskeiðar vínsteinslyftiduft
• ½ teskeið fínt sjávarsalt
• ½-1 teskeið kanill
• 1 stórt (hamingju)egg
• 1 eggjahvíta (stórt egg)
• 100 g lífrænn hrásykur (½ bolli)
• 2 matskeiðar hreint hlynsíróp
• 1 matskeið kókosolía
• 2 stór rauð epli

Útfærsla: Það má nota minna af kanil og/eða nota engifer eða múskat, eða bæði. Stundum bæti ég út í einni lúku af hökkuðum pekanhnetum og ég hef líka notað rúsínur. Smá lífrænt súkkulaði, fínhakkað, er líka gott; 20 g er nóg og sleppið þá einni matskeið af sírópinu.

AÐFERÐ

1. Blandið þurrefnunum saman í skál og setjið til hliðar
2. Í aðra skál skuluð þið hræra saman eggi, eggjahvítu, hrásykri, hlynsírópi og kókosolíu (ef kókosolían er í föstu formi látið þá krukkuna standa í skál með heitu vatni fyrir notkun)
3. Afhýðið eplin og fjarlægið steinana. Rífið eplin á grófu rifjárni og bætið þeim svo út í eggja- og sykurblönduna og blandið saman með sleif eða sleikju
4. Bætið þurrefnablöndunni út í og hrærið bara létt, alls ekki mikið. Deigið á að vera létt í sér þannig að þið þurfið bara rétt að velta því með sleif þar til hráefnin hafa blandast saman
5. Smyrjið silíkonmöffinsform með kókosolíu áður en deigið fer í formin (gerir 12 stykki). Þið getið ekki notað pappírsform fyrir þessa uppskrift þar sem hún inniheldur litla fitu
6. Bakið við 200°C (180°C á blæstri) í 22-25 mínútur
7. Látið kólna í formunum á kæligrind í 5-10 mínútur

fjölkornabrauð með rósmarín og timían

Ég hafði ekki notað ger í þrjú ár þegar ég setti þessa uppskrift saman. Ég hef ekkert á móti geri heldur finnst mér einfaldlega svo þægilegt að baka brauð með vínsteinslyftidufti því þá þarf ekki að láta deigið hefast, það er tilbúið strax til baksturs. Ég er voðalega hrifin af slíkum bakstri. Jæja, svo gerðist það að eiginmaðurinn greip ranga pakka í heilsuvörudeildinni og kom heim með dágóðan slatta af geri. Mér fannst eitthvað asnalegt að fara og skila þeim þannig að ég setti bara á mig svuntuna og lagðist í smá tilraunir. Ég viðurkenni að það var skrýtið að nota ger að nýju og ég þurfti að venjast lyktinni. Það er þess vegna sem ég ákvað að nota kryddjurtir í brauðið. Hvað um það, þessi uppskrift er ein af þeim sem kom út úr þessum tilraunum og aðrar verða birtar síðar. Ef keypt er þurrger í heilsubúðum þá inniheldur það engin aukaefni. Pakkarnir sem ég nota innihalda 9 grömm af geri og eru hugsaðir fyrir 500 grömm af mjöli. Það þarf ekki að blanda þessu geri saman við vatn, það blandast bara saman við þurrefnin þannig að þetta er ákaflega þægilegur bakstur. Í flestum geruppskriftum er talað um að hnoða deigið mjög vel, jafnvel í margar mínútur, en mér finnst best að hnoða það sem minnst (sennilega vegna þess að ég nota spelti). Ég geri tvo meðalstóra brauðhleifa úr deiginu.

FJÖLKORNABRAUÐ MEÐ RÓSMARÍN OG TIMÍAN

HRÁEFNI

• 500 g spelti
• 1 pakki þurrger (9 g) - sjá lýsingu í inngangi
• 1 teskeið fínt sjávarsalt
• ½ matskeið hrásykur, lífrænn
• ½ matskeið graskersfræ
• ½ matskeið hörfræ
• ½ matskeið sesamfræ
• ½ matskeið sólkjarnafræ
• 1 teskeið timían
• ¼ teskeið rósmarín
• 150 ml heitt vatn
• 125 ml sojamjólk eða önnur tegund mjólkur
• 1 matskeið létt ólífuolía eða önnur gæða jurtaolía

AÐFERÐ

1. Blandið öllum þurrefnum saman í stóra skál
2. Sjóðið vatn og blandið svo vatninu, mjólkinni og olíunni í mælikönnu. Blandið rólega saman við þurrefnin á meðan þið hrærið með sleif
3. Notið aðra höndina til þess að hnoða deigið örlítið á meðan það er í skálinni. Ef það er enn þurrt spelti á botninum þá má bæta við 1-2 matskeiðum af vatni og hnoða aðeins lengur. Passið bara að deigið verði ekki klístrað
4. Setjið lok á skálina eða viskustykki og látið deigið hefast í 45 mínútur á hlýjum stað
5. Setjið bökunarpappír á bökunarplötu. Skiptið deiginu í tvennt, stráið örlitlu spelti á borðplötuna og hnoðið hvorn helming. Ég byrja á því að mynda eins konar kúlu og ég breyti henni rólega í lengju sem ég rúlla aðeins fram og til baka. Stærðin á hverjum brauðhleif verður ca. 10 x 22 cm
6. Bakið við 200°C í 20-22 mínútur

heimagerður vanillusykur

Síðustu mánuði hef ég verið ódugleg að pósta á síðuna og það er kominn tími til að bæta úr því. Höfum þetta bara einfalt í dag og byrjum næstu lotu á heimagerðum vanillusykri. Það er ótrúlega einfalt að búa hann til. Ég keypti mér glerkrukku með áföstu loki alveg sérstaklega fyrir vanillusykurinn því þá sé ég alltaf hversu mikið ég á eftir.

Vegna fyrirspurnar sem ég fékk þá hef ég uppfært „uppskriftina“ og bætt eitlítið við aðferðarlýsinguna. Ég las einhvers staðar að þumalputtareglan væri að nota 2 bolla af sykri (= 500 ml) á móti einni vanillustöng og þá ætti að taka um tvær vikur að fá góðan vanillusykur. Ég nota 1 bolla (= 250 ml). Ef þið eigið góða matvinnsluvél þá er ekki verra að vinna vel sykurinn og kjarnann úr vanillunni áður en það fer í krukku (eftir að þið hafið losað kjarnann þá má stöngin líka fara í matvinnsluvélina en passið bara að þið séuð með það góða vél að hún vinni þetta vel). Þið getið notað sigti til þess að koma í veg fyrir vanillukekki eins og þið sjáið í krukkunni minni og til að fjarlægja parta af stönginni sem þið viljið ekki hafa í krukkunni.

HEIMAGERÐUR VANILLUSYKUR

HRÁEFNI

• 1-2 bollar (250-500 ml) lífrænn hrásykur, ekki of grófur
• 1 vanillustöng

AÐFERÐ

1. Byrjið á því að kljúfa vanillustöngina í tvennt: skerið í gegnum hana miðja með beittum hníf, og skafið kjarnann úr henni með hnífsoddinum
2. (Ef þið eigið góða matvinnsluvél kíkið þá á aðferðina í innganginum)
3. Setjið hrásykur í glerkrukku (með loki) ásamt kjarnanum og vanillustönginni sjálfri. Það þarf ekki að setja kjarnann í krukkuna heldur er nóg að setja bara vanillustöng sem hefur verið skorin í tvennt og kjarni fjarlægður. En ég nota kjarnann, mér finnst það skemmtilegra og það gefur enn meira vanillubragð
4. Geymið í lokaðri glerkrukku og skiptið reglulega um vanillustöng/kjarna

epla- og súkkulaðimöffins

Ég skellti þessari uppskrift saman fyrr í dag og ákvað að deila henni strax með ykkur. Ég notaði bara sama grunninn og venjulega og bætti svo við rifnum eplum og súkkulaðihnetusmjöri. Ég kaupi einungis lífrænt súkkulaðihnetusmjör, aldrei Nutella eða slíkar tegundir. Það má að sjálfsögðu nota heimagert ef maður á það til. Súkkulaðihnetusmjörið gerir toppana örlítið stökka og brakandi og það lagðist greinilega vel í mitt fólk í dag. (Ef þið eruð með hnetuofnæmi þá getið þið notað kókosolíu í staðinn fyrir súkkulaðihnetusmjör og örlítið kakó eða lífræna súkkulaðibita.) Þetta er ein af þessum uppskriftum sem er einföld og því kjörið að skella í þessa möffinsa þegar mann langar í eitthvað örlítið sætt með kaffinu. Og þar sem þeir eru ekki mjög sætir er tilvalið að bjóða upp á þá sem hluta af t.d. sunnudags 'bröns' eða hafa með í nesti í vinnuna/skólann.

EPLA- OG SÚKKULAÐIMÖFFINS

HRÁEFNI

• 1½ bolli spelti
• 2 teskeiðar vínsteinslyftiduft
• ½ teskeið fínt sjávarsalt
• 1 (hamingju)egg
• ½ bolli hrásykur
• 3 matskeiðar lífrænt súkkulaðihnetusmjör
• 2 rauð epli (ekki of stór), afhýdd og rifin gróft

AÐFERÐ

1. Blandið þurrefnunum saman í skál og setjið til hliðar
2. Í aðra skál skuluð þið hræra saman eggi og hrásykri
3. Afhýðið eplin og fjarlægið steinana. Rífið eplin á grófu rifjárni
4. Bætið rifnu eplunum út í eggjablönduna ásamt súkkulaðihnetusmjörinu og blandið saman með sleikju
5. Bætið þurrefnablöndunni út í og alls ekki hræra mikið. Deigið á að vera létt í sér þannig að þið þurfið bara rétt að velta því með sleikjunni þar til hráefnin hafa blandast saman
6. Smyrjið silíkonmöffinsform með smá kókosolíu (mér finnst nóg að bara rétt pensla botnana) áður en deigið fer í formin (gerir 12 stykki). Þið getið ekki notað pappírsform fyrir þessa uppskrift þar sem hún inniheldur litla fitu
7. Bakið við 200°C í 23-27 mínútur
8. Látið kólna í formunum á kæligrind í 5-10 mínútur

kanilsnúðar (gerlausir)

Ég hef nákvæmlega ekkert á móti geri en mér hreinlega leiðist gerbakstur. Ég nenni ekki að bíða eftir því að deig hefi sig og því finnst mér best að nota vínsteinslyftiduft. Fyrir um tveimur árum síðan gerði ég tilraun með uppskrift að gerlausum kanilsnúðum sem heppnaðist þannig séð vel. Allt heimilisfólk var alla vega ánægt en ég var ekki alveg sátt, ég vildi hafa þá aðeins mýkri, svona bollulegri. Á fallegum sunnudegi í september sat ég í stofunni að lesa og lét mig dreyma um mjúka kanilsnúða að bíta í. Allt í einu fékk ég hugmynd og fór beinustu leið inn í eldhús, setti upp svuntuna og það sem ég kýs að kalla ósýnilega aðgangur-bannaður skiltið á eldhúshurðina. Tilraunin heppnaðist eins og í sögu og við tók dásamlegt sunnudagsmorgunkaffi með miklum nammi namm hljóðum. Mér finnst betra að mynda ferning úr deiginu heldur en ílangan ferhyrning því ég vil hafa kanilsnúðana svolítið þykka. Uppskriftin er án eggja og það er enginn sykur í deiginu sjálfu og þrátt fyrir það eru snúðarnir dásamlegir á bragðið.

KANILSNÚÐAR

HRÁEFNI

DEIG

• 435 g spelti
• 2-2½ matskeiðar vínsteinslyftiduft
• ¾ teskeið sjávarsalt
• 250-300 ml sojamjólk eða önnur mjólk
• 1-2 matskeiðar kókosolía

FYLLING

• 1 matskeið agave síróp eða hreint hlynsíróp
• ½ matskeið kókosolía
• 3½ matskeið hrásykur, lífrænn
• 1 teskeið kanill
• útfærsla: ögn af hökkuðum pekanhnetum og/eða rúsínur

AÐFERÐ

1. Byrjið á deiginu: Blandið saman spelti, vínsteinslyftidufti og salti í stórri skál. Yfirleitt nota ég 2 matskeiðar af vínsteinslyftiduftinu en stundum bæti ég við hálfri matskeið til að gera snúðana aðeins stærri. (Ef þið notið venjulegt lyftiduft þá þurfið þið bara eina matskeið og ½-1 teskeið til viðbótar ef þið viljið gera þá bara örlítið stærri)
2. Bætið 1-2 matskeiðum af kókosolíu út í. (Ef kókosolían er í föstu formi látið þá krukkuna standa í skál með heitu vatni fyrir notkun)
3. Byrjið á því að bæta 250-275 ml af mjólkinni út í og hrærið rólega með sleif. Bætið við meiri mjólk ef þið þurfið. Deigið á ekki að vera of blautt þar sem þið eigið eftir að hnoða það í höndunum og fletja út með kökukefli. Það er ágætt að hnoða það aðeins með höndunum í skálinni til þess að finna áferðina á því; það á ekki að loða við fingurna
4. Stráið vel af spelti á borðplötuna og hnoðið deigið í höndunum. Ef deigið vill festast við yfirborðið stráið þið meira af spelti á flötinn
5. Takið því næst kökukefli og fletjið deigið út. Leitist við að mynda ferning sem er ca. 37 cm. Ég kýs að mynda ferning heldur en ílangan ferhyrning því mér finnst betra að hafa kanilsnúðana svolítið þykka
6. Þá að fyllingunni: Blandið saman sírópinu og kókosolíunni í lítilli skál. Útbúið kanilsykurinn í annarri skál.
7. Dreifið síróps- og olíublöndunni jafnt yfir útflatta deigið (mér finnst best að nota bara fingurna). Stráið svo kanilsykrinum yfir og bætið við smá af pekanhnetum og/eða rúsínum ef þið notið þá útfærslu
8. Rúllið upp deiginu nokkuð þétt. Notið svo beittan hníf til þess að skera lengjuna í 21 sneið (það er ágætt að byrja á því að skera lengjuna í tvennt). Þykkt hverrar sneiðar á að vera aðeins minni en 2 cm
9. Klæðið 35 x 25 cm form með bökunarpappír eða smyrjið létt með kókosolíu (hæð formsins sem ég nota er ca. 5 cm). Myndið fjórar raðir með fjórum snúðum. Myndið svo eina röð með fimm snúðum og hafið báða endana í henni
10. Bakið við 220°C í 12-15 mínútur
11. Leyfið kanilsnúðunum að kólna í forminu í nokkrar mínútur áður en þið berið þá fram

tómatpastasósa með hvítlauk og ferskri basilíku

Þetta er nú alveg á mörkum þess að kallast uppskrift því einfaldara gerist það varla. Fólki kann að finnast það skrýtið en við kaupum svo til aldrei 'take-out' mat. Við gerðum meira af því hér áður fyrr en á síðastliðnum tveimur árum hefur það kannski gerst tvisvar. Ef við höfum lítinn tíma í eldhúsinu þá er aðalatriðið að skella í eitthvað sem er einfalt og tekur lítinn tíma, eins og t.d. þessa fersku tómatpastasósu á meðan pastað sýður í pottinum. Heimagert er bara svo miklu betra – það finnst mér alla vega.

TÓMATPASTASÓSA MEÐ HVÍTLAUK OG FERSKRI BASILÍKU

HRÁEFNI

• 325-350 g kirsuberjatómatar
• ½ matskeið ólífuolía
• 1-2 hvítlauksrif, pressuð
• 1 teskeið agave eða hrásykur
• ½-1 matskeið söxuð fersk basilíka
• sjávarsalt og nýmalaður svartur pipar eftir smekk

AÐFERÐ

1. Skerið tómatana í fernt og steikið upp úr ólífuolíunni á lágum hita
2. Bætið restinni af hráefninu út í og látið malla við lágan hita á meðan þið sjóðið pastað
3. Saltið og piprið eftir smekk og berið fram með brauði eða einföldu gulrótasalati

PS. Þið getið notað basilíkukrydd í staðinn fyrir ferska basilíku. Það er svona þumalputtaregla að nota eina teskeið af kryddi á móti matskeið af ferskri jurt; ég hef ekki notað það sjálf í þessa þannig að þið notið bara meira ef ykkur finnst bragðið aðeins of dauft.

eplakaka

Síðan mín á eins árs afmæli í dag og það er tilvalið að halda upp á það með eplaköku, uppáhaldi eiginmannsins. Þessi var alveg sérstaklega þróuð fyrir hann því hann elskar eplakökur, ekki bökur heldur kökur, og ef hann mætti ráða þá væri ekkert annað bakað á þessu heimili. Það verður að segjast eins og er að það er eitthvað dásamlegt við heita eplakökusneið með rjóma. Það tók nú ekki langan tíma að þróa þessa því stundum er bara eins og rétti eldhúsandinn sé yfir manni: hún heppnaðist í fyrstu tilraun og bóndinn lét mig lofa sér að gera engar breytingar á uppskriftinni. Ég hef bakað þessa fyrir fólk sem er vanara því að fá ekkert nema dísætar kökur með smjöri og allir lofa kökuna. Ég hef auk þess birt uppskriftina á ensku síðunni og hef fengið góð viðbrögð í tölvupóstum. Bara eitt að lokum: Ekki gleyma að dreifa kanilsykrinum yfir eplin! Ég ætla ekki að segja ykkur hversu oft ég er nálægt því að gleyma þessu atriði í aðferðinni. [Uppfærsla 10. feb. '13: Undanfarið hef ég aðeins verið að leika mér með uppskriftina og hef minnkað hrásykurinn eilítið (magnið var áður ½ bolli eða 100 g). Við bökum þessa köku svo oft og núna þegar ég nota alltaf stór egg þá finnst mér nóg að nota 2 msk af kókosolíu, þess vegna setti ég inn 2-3 msk. Sjá útfærslu af stærri köku neðar.]

EPLAKAKA

HRÁEFNI

• 70 g hrásykur
• 2 matskeiðar hreint hlynsíróp eða agave síróp
• 2 stór (hamingju)egg
• 2-3 matskeiðar kókosolía, fljótandi
• 1 bolli (130 g) spelti (má nota gróft og fínt til helminga)
• 2 teskeiðar vínsteinslyftiduft
• 2 rauð epli, helst lífræn
• kanilsykur (útbúinn með hrásykri) eftir smekk

AÐFERÐ

1. Setjið hrásykur, agave, egg og kókosolíu í bökunarskál og hrærið með pískara (ef kókosolían er í föstu formi látið þá krukkuna standa í skál með heitu vatni fyrir notkun)
2. Blandið speltinu og vínsteinslyftiduftinu saman í aðra skál og blandið svo saman við hina blönduna með sleikju
3. Notið eplaskera (ef þið eigið hann til) til þess að sneiða eplin, afhýðið sneiðarnar og skerið svo hverja sneið í þrennt, langsum
4. Klæðið ca. 20-23 cm hringform með bökunarpappír eða smyrjið bökudisk með örlítilli kókosolíu
5. Dreifið aðeins minna en helmingnum af deiginu í botninn með sleikju. Ef deigið er stíft þá er ágætis ráð að dýfa sleikjunni ofan í ílát með heitu vatni
6. Raðið eplasneiðunum í hring á botninn, nokkuð þétt þannig að brúnin á hverri sneið sé aðeins uppi á næstu og fyllið svo upp í miðjuna (því smærra form sem notað er því þéttar raðast sneiðarnar)
7. Stráið kanilsykri yfir eplin (á þessu heimili er kanilsykur mikið notaður og lítið pælt í hlutföllum hrásykurs og kanils þegar hann er útbúinn en einhvers staðar las ég að ágætis hlutföll í bakstur eru 1 matskeið hrásykur á móti 1 teskeið af kanil). Það má líka alveg strá kanil eingöngu yfir eplin
8. Dreifið restinni af deiginu yfir eplin, rólega svo eplin færist ekki öll úr stað og munið að dýfa sleifinni í heitt vatn ef deigið er stíft. Þetta með deigið veltur svolítið á stærð eggjanna sem notuð eru og á rakanum í eldhúsinu hverju sinni. Stundum er eins og ég þurfi ekkert að nota sleikju til þess að dreifa deiginu heldur virðist vera nóg að hella því bara rólega úr skálinni yfir eplin (áferðin er ekki fljótandi heldur þykk í sér). En notið alla vega sleikju til þess að skafa restina af deiginu úr skálinni
9. Bakið á blæstri við 150° C neðst í ofninum í 40-55 mínútur þar til toppurinn er orðinn gullinbrúnn (því minna form því lengri bökunartími - stingið prjóni í miðja kökuna til að athuga hvort hún sé tilbúin). Ef toppurinn fer að verða of dökkur í ofninum og töluvert eftir af baksturstímanum þá er ágætt að setja álpappír yfir formið
10. Berið kökuna fram með þeyttum rjóma eða ís

…

Um daginn tókst mér að brjóta eldfasta mótið sem ég hef alltaf notað til að baka kökuna. Það var ca. 22-23 cm í þvermál. Ég á eftir að kaupa mér nýtt og hef því verið að baka kökuna í eilítið stærra móti. Ég setti því saman stærri útgáfu af kökunni. Ég nota 3 msk af kókosolíunni í stærri útgáfuna og nota stór egg og bæti við einni eggjahvítu. Ég nota líka stór epli.

EPLAKAKA, STÆRRI KAKA

HRÁEFNI

• 100 g hrásykur
• 2-½ matskeið hreint hlynsíróp eða agave síróp
• 2 stór (hamingju)egg
• 1 eggjahvíta (af stóru eggi)
• 3 matskeiðar kókosolía, fljótandi
• 200 g spelti (má nota gróft og fínt til helminga)
• 2½ teskeiðar vínsteinslyftiduft
• 2 stór rauð epli, helst lífræn
• kanilsykur: ½ matskeið hrásykri og ½ teskeið kanill

Aðferðin er alveg sú sama nema ég baka þessa við 170° C (undir- og yfirhiti, ekki á blæstri) og hef hana í ca. 55 mín. í ofninum. Þegar ca. 25 mínútur eru eftir læt ég bökunarpappír yfir mótið í ofninum þannig að kökutoppurinn verði ekki of dökkur.

bananamöffins með hindberjum og mangó

Þessi uppskrift varð óvart til á góðum sunnudegi. Ég var að fara í gegnum frystinn og rakst á hindber í boxi sem ég hafði gleymt og mangó sem ég hafði fryst. Ég átti banana sem ég þurfti að fara að nota og ákvað bara að nýta þetta hráefni til að gera eitthvað gott fyrir krakkana í nesti. Ég var ekki með tölvuna við hlið mér en mundi eftir uppskrift að mangó- og bananamöffins með pekanhnetum frá CafeSigrun þannig að við skulum orða það þannig að ég hafi verið undir hennar áhrifum. Krakkarnir voru alsælir og kvarta ekki þegar þeir finna þessa í nestisboxinu. Það má gera þessi með eða án kakó og svo má nota lífrænt súkkulaði til þess að gera þau nammileg með sunnudagskaffinu.

BANANAMÖFFINS MEÐ HINDBERJUM OG MANGÓ

HRÁEFNI

• 1½ bolli spelti
• 40 g haframjöl
• 2 teskeiðar vínsteinslyftiduft
• ½ teskeið fínt sjávarsalt
• 1 teskeið kanill
• 1 matskeið kakó (má sleppa)
• 1 (hamingju)egg
• ½ bolli hrásykur
• ½ matskeið límónusafi, nýkreistur
• 1 matskeið kókosolía
• 3 bananar
• 1 dl frosin hindber (ca. 50 g) + ½ teskeið hrásykur
• ½ dl mangó (ca. 25 g)
• 25 g möndlur, saxaðar
• nammiútgáfa: 25 g lífrænt 70% súkkulaði

AÐFERÐ

1. Byrjið á því að tæta frosin hindber í matvinnsluvélinni, setjið þau svo í litla skál, hrærið ½ tsk af hrásykri út í og látið þiðna á borðinu í 7 mínútur eða svo. Setjið skálina svo strax aftur í frysti og geymið þar uns þið notið berin í deigið (þið getið þess vegna gert þetta deginum áður til að undirbúa baksturinn)
2. Blandið þurrefnunum saman í stórri skál og setjið til hliðar
3. Í minni skál skuluð þið hræra saman eggi, hrásykri, límónusafa og kókosolíu (látið kókosolíukrukkuna standa í skál með heitu vatni fyrir notkun)
4. Stappið bananana og bætið þeim út í eggjablönduna
5. Skerið mangóið í mjög smáa bita og setjið til hliðar
6. Saxið súkkulaðið ef þið notið það og setjið til hliðar
7. Saxið möndlurnar vel í matvinnsluvél þannig að hluti þeirra verður nánast að mjöli og blandið saman við þurrefnin
8. Notið sleikju til þess að blanda eggja- og bananablöndunni rólega saman við þurrefnin og alls ekki hræra mikið. Deigið á að vera létt í sér þannig að þið þurfið bara rétt að velta deiginu með sleikjunni þar til hráefnin hafa blandast saman
9. Takið sykruðu hindberin úr frystinum og bætið út í deigið ásamt mangóinu og súkkulaðinu ef þið notið það og blandið þessu rólega saman við
10. Smyrjið silíkonmöffinsform með smá kókosolíu áður en deigið fer í formin (gerir 12 stykki). Þið getið ekki notað pappírsform fyrir þessa uppskrift þar sem hún inniheldur litla fitu
11. Bakið við 180°C á blæstri í 23-27 mínútur
12. Látið fyrst kólna í formunum og svo á kæligrind í 5-10 mínútur